【醫生信箱】Q52. 社交焦慮與上學安排？

Q52.: 17歲兒子可能有社交焦慮，近排因為同班女同學取笑之後，已經不願意返學，想請問一下呢一刻係咪唔適合俾佢返學？

---

Ans.: 呢個係個比較難取捨既問題。家長可能想俾仔仔係屋企休息下，再番去學校面對；但另一方面又擔心佢唔番學所做成既影響。

答呢個問題，主要視乎番仔仔既情緒去決定。如果佢情緒唔算太差，無任何傷害自己既行為或者諗法，我會鼓勵佢番學，但同時間要搵適當既支援，例如心理學家、社工、輔導等等。呢個可以視為仔仔既一個挑戰，如果佢處理到，佢會變到更有信心去處理呢啲人際問題。

但如果佢既情緒真係好差，好抑鬱，甚至好多負面思想或有傷害自己既行為，咁就要搵醫生評估下同埋睇下係咪要放病假。如果放病假，都儘量鼓勵仔仔接觸番啲好朋友同埋係學業上都儘力咁跟進下，避免佢之後番番學跟唔上進度仲大壓力。

最擔心既情況係，情況無好好處理，然後仔仔用左拒學嚟到逃避，咁既做法一開始可能有用，但當佢要番去面對番學校個環境既時候，個挑戰只會令佢更大壓力，因為佢對學校停留左係個好差既印象(俾人取笑)。 ✍🏻撰文：精神科專科醫生 張正平醫生