【醫生信箱】Q2. 小朋友專注力好差、好反叛、上網成癮，點先可以幫到佢？

Q2.: 醫生，你好。我個仔仔今年11歲，最近因為專注力好差、好反叛，加上上網成癮，搞到成個人好消極，咩事都唔想做。平時同佢傾偈，都話我煩。

佢喺學校的情況好差，上堂完全唔聽書、唔拎書出嚟、唔做功課，甚至會趴喺枱度瞓覺，尤其係中文堂最嚴重。英文堂會相對好啲，肯聽少少。我已經要求社工介入，但要等好耐先見到一次。我想問下，精神科醫生或者心理醫生可唔可以幫到佢呢？

我想自己直接搵私家醫生或者心理醫生睇，又唔知應該點樣搵、搵邊個好？

多謝醫生解答。

Ans (✍🏻精神科專科醫生張正平醫生)

聽到你嘅形容，完全明白你嘅無助同心痛。有陣時越想幫個仔女，越會俾左壓力俾佢地，然後佢地會覺得好煩，好囉嗦。當然，阿仔既問題係要正視，同埋要早啲處理。

阿仔既情況可能同專注力不足及過度活躍症（ADHD）、對抗性行為障礙 (ODD)、情緒問題或網路成癮有關。以上情況係有機會一齊出現(共病)，同時互相影響。學校情況差（唔聽書、瞓覺），可能係專注問題導致挫敗感，影響學習意慾，構成惡性循環。

精神科醫生同臨床心理學家都可以為阿仔作出評估，而且越早介入越好﹕公立收費較便宜，但輪候時間較長；私家可以儘快約見，但收費較貴。

精神科醫生同臨床心理學家分別可以做乜？

• 精神科醫生：全面評估、診斷有冇共病。如果需要，可以處方藥物，幫助改善專注力、衝動同情緒控制。

• 臨床心理學家：全面評估。通過心理治療處理仔仔行為及情緒問題、協助改善學習困難及溝通問題。

簡單嚟講，如果擔心阿仔嘅行為可能同ADHD有關，需要考慮藥物治療，可以優先搵精神科醫生；如果想先全面了解佢嘅心理、情緒同學習困難背後嘅原因，就可以考慮搵臨床心理學家。好多時醫生同心理學家會互相配合(團隊形式)，一個負責診斷同藥物治療，一個就提供深入嘅評估同心理治療。

家長現時可以試下其他方法

- 約見學校社工或班主任，了解一下阿仔喺學校嘅具體情況，睇下佢地有無初步建議或者學校有無支援方案。

- 善用地區資源，處理網路成癮問題：可以向東華三院心瑜軒「不再迷網」或香港基督教服務處「網開新一面」，尋求支援。

注意事項

• 唔係所有「懶」同「反叛」都係病，但如果影響到學業、家庭關係等，就值得安排評估。

• 家長照顧壓力都大，記得照顧自己情緒。