【醫生信箱】Q62. 我咁蠢點算？可唔可以考0分？我咁蠢係咪要死？

Q62. 女女9歳，5歳CAC 評了ASD + 早期讀寫，7歳EP 評了讀寫困難，而家在主流中文小學就讀，她好勤力，但中文真係仲係好差。老師同我都好多鼓勵，佢都自己要求補習，8歳小三1週1次，下學期測考前開始出現焦慮到失禁。10月中小四測驗前，補習老師無理地鬧佢﹕死蠢、咁蠢架，教極都唔明。佢果一星期就嚴重焦慮，一定要痴實我，不停問我﹕我咁蠢點算？可唔可以考0分？我咁蠢係咪要死？媽媽你死左我點算(1日問廿次都有)？所以我果星期無同佢溫書，而係同佢放鬆同畫畫增強佢自信先。當然，果間補習立即停，唔會再去，我女都好怕嗰位老師。而之後女女要求想日日都溫書，我同佢安排功課班(適應新環境及新老師 2星期)。佢而家都喜歡這位新老師補習。不過，D焦慮都隔2日就出現。我知道ASD都係行為去改善情況，焦慮唔知可以行為改善定應該食咩？我都只可以正面回應同理解佢感受，但都仍解唔開個結。

---

Ans. 明白作為媽媽既難受。

我地去理解(或者評估)一個小朋友既情況可以用以下呢個方法，會比較全面(利申﹕呢個係我個人經驗，只供參考)。

1. ASD (自閉症譜系)﹕社交能力、溝通能力較弱、性格固執、興趣狹窄

2. ADHD (專注力不足及過度活躍症)﹕專注失調、過度活躍、衝動

3. 智力

4. 讀寫障礙

5. 情緒問題 (抑鬱、焦慮等等)

6. 行為問題 (反叛行為、Tics 等等)

以上6組問題可以同時出現 (共病)。

比較會影響成績﹕專注力不足(2)，智力障礙(3)，讀寫障礙(4)，抑鬱(5)

比較會影響行為﹕社交能力 (1)，衝動(3)，反叛行為(6)

ASD、ADHD 處理得唔好，又會容易衍生情緒同行為問題。

就你既形容，女女有ASD同埋讀寫障礙。佢做讀寫障礙評估呢，基本上要確保佢係智力正常，所以雖然你無提及，但佢智力應該係 80分或以上 (排除有限或低下智力)，所以小朋友一啲都唔蠢。佢既學業困難主要源至佢既讀寫障礙，但都可以問下老師，睇下小朋友上堂有無唔專心既表現、有無成日遊雲、善忘、做野好唔小心等等。

讀寫既困難主要靠訓練，但專心唔到既問題可以通過藥物改善﹗

至於如何幫助孩子提升讀寫能力，可以參考教育心理學家李穎昕受訪片段 https://www.healthymindhk.com/post/how-to-help-children-learn

小朋友好在意自己既學業表現，好想改善自己既成績，好擔心自己既表現，出現焦慮情緒。作為家長除左安排補習，適當的鼓勵及陪伴同樣重要，同時亦須要協助小朋友建立其它既興趣及喜好，希望小朋友可以係其它方面提升自信心。

處理小朋友情緒問題，一般指引會建議非藥物治療為主，例如遊戲治療、心理治療、藝術治療等等。如果小朋友情況比較嚴重，例如有傷害自己行為或傾向，便須考慮藥物介入。治療方案主要視乎小朋友個別情況去決定，有時甚至須要藥物 + 非藥物治療。

至於飲食及營養建議，可以參考以下文章﹕

https://www.healthymindhk.com/post/asd_nutrition_supplements