【醫生信箱】Q76. 7歲 ASD + ADHD，不停撩耳仔？
- 1天前
- 讀畢需時 2 分鐘
【醫生信箱】Q76. 小朋友7歲女仔，ASD+ADHD 行為好衝動、唔專心同埋好容易情緒波動，平時上課服用Vyvanse 20mg後情緒平穩可以安靜上課，但經常會因為無聊而撩耳仔，會因為撩到痛而大叫大喊，睇過耳鼻喉科檢查耳仔入面冇發炎情況，唔知咩原因令佢耳仔唔舒服。另外長假期停藥後情緒非常波動，好容易就大叫大喊，是否藥物假期令佢無法控制情緒？
Ans (✍🏻精神科專科醫生 張正平醫生)
關於上課時「撩耳仔」到大叫大喊
耳鼻喉科醫生已排除生理上的問題，「撩耳仔」呢個行為較大機會不是源自「耳仔唔舒服」，而可能係ASD 常見的「自我刺激行為」 (Self-stimulating behavior / Stimming) : ASD 小朋友通過重複的行為來調節情緒、紓解壓力、自我安撫或集中注意力。
小朋友撩耳仔撩到痛但繼續、甚至大叫，可能係因為佢對痛覺嘅處理同一般小朋友唔同，又或者大叫本身係一種發洩緊張或表達「唔知點停」嘅方式。
咁點樣處理？
第一、透過觀察、記錄、溝通，了解番小朋友遇到既困難。
第二、嘗試幫佢搵替代行為。例如：同老師商量下，俾佢一個細細嘅「感官工具包」：軟膠粒、壓力球等，喺佢好無聊、困擾嘅時候俾佢揸住。
第三、考慮轉介職業治療師做感統評估及訓練。
第四、如果情況嚴重，可以同醫生商量，考慮使用針對ASD情緒波動嘅輔助藥物（例如低劑量Aripiprazole）。
關於長假期停藥後情緒大波動
對於ASD + ADHD嘅小朋友，「藥物假期」可能未必適合。因為佢哋嘅情緒調節本身已較脆弱，反彈風險較高，而且停藥後嘅行為問題有機會影響家庭生活同親子關係。一般建議，如果副作用唔明顯，應該持續用藥。即使真係需要停，都應該同醫生商量，同時可以考慮改用劑量較低、或者藥效較短既藥物係特定時段補上，而唔係突然完全停藥。