【醫生信箱】Q78. 5歲 ASD 小朋友，不停傻笑？
- 2天前
- 讀畢需時 2 分鐘
【醫生信箱】Q78. 5歲ASD 小朋友，間中會傻笑唔停（大約5分鐘）。晚上大約7點幾就會咁。老師話佢係學校都間中會咁樣。問佢笑咩又唔識講。唔知點處理好。
Ans (✍🏻精神科專科醫生 張正平醫生)
呢種「無故」嘅傻笑，喺自閉症譜系嘅小朋友身上並唔罕見，有機會係佢嘅感官、溝通或情緒調節方式同其他人有分別。
「傻笑」可能嘅原因：
自我刺激/感官需要：傻笑嘅感覺，可能為佢提供咗一種舒適嘅感官輸入。夜晚7點幾，可能係佢比較攰，感官負荷過重，用呢種方式嚟幫自己放鬆。
表達佢嘅內在狀態： 佢可能唔係笑緊「某件事」，而係笑緊一啲我哋察覺唔到嘅內在感覺，例如：腦入面突然浮現一個有趣嘅影像、記起一個開心嘅聲音、或者身體有一種突如其來嘅愉悅感。佢唔係唔想講，而係真係講唔到，自閉症小朋友既表達能力一般較弱。
固定嘅行為模式/儀式： 自閉症小朋友好鍾意規律，每晚同一時間出現，可能已經成為咗一個固定嘅「日程」。
作為家長可以點處理？
觀察同記錄 (使用ABC 行為分析法)
事發前 (Antecedant)： 行為發生前佢喺度做緊咩？
事發時 (Behavior)： 除咗笑，仲有冇其他動作？叫佢有冇反應？
事發後 (Consequence)： 笑完之後佢係咪即刻恢復正常？有無其它行為？
即時應對策略
唔須要嚴厲制止， 責罵會增加佢嘅焦慮。
溫和咁轉移佢既注意力：嘗試用身體語言（例如坐喺佢旁邊）或一件佢鍾意嘅事物去嘗試轉移佢嘅注意力。
如果懷疑係感官需要，可以考慮轉介職業治療師做感統評估及訓練。
長遠支援
強化溝通能力： 佢唔識用口講，可以教佢用其他方法表達。例如，整一啲「情緒卡」，上面有「開心」、「攰」、「無聊」等圖案。當佢笑完冷靜落嚟後，你可以指住卡片問：「你頭先係咪覺得……？」
長遠搵言語治療師做訓練
調整作息： 嘗試調整下7點前後既活動安排
如果您試咗上述方法都冇改善，或者仔仔出現其他令你擔心嘅新行為，就請帶佢見下精神科醫生。